成日覺得去過海外升學嘅同學講嘢唔同咗。 除左口音開始擺脫”香音“之外，仲發現佢哋嘅用詞地道咗，去咗一年做交換生，真係咁唔同？的確係，最大嘅分別係唔再只係用得出香港書本果啲書面英文(有人問你How are you其實可以唔净係答I’m fine, thank you,仲可以話I’m alright/ Not bad/ Good, you?等等😂 )，仲用得出美國人平日對話果啲生活用詞。今次會share下一個都幾常出現嘅字。
同義字呢樣嘢喺學校讀書都有讀，解唔同嘅字詞都可以表達同一個意思，好似「老友」、「 死黨」、「我班兄弟」等等都可以解為「我班friend」咁。又有的字好型，叫做一字多義，即係跟同義字相反，佢一個字可以解幾個意思。我好記得美國有一個常用嘅字，佢唔單止一字多義，仲要好又可以用佢，壞又可以用佢，呢個字叫做Mean。
Mean 的三個用法
- 香港人正路用法
- 係美國生活過會知嘅用法
- 地道local 用法
So, what is the meaning of Mean?
Mean，大家小學都學過，佢嘅意思係意思。唔好意思，應該加返標點符號大家先明我講乜，小意思。（搞完爛gag了😂）返返正題，Mean既動詞係解「意思」，例如：What do you mean? 你既意思係咩？
或者「故意」，例如：I don’t mean to steal your boba tea. 我唔係故意偷你杯珍珠奶茶飲。 （如果你個friend同你講呢句說話你就可以回應返佢What do you mean you didn’t mean to steal my boba tea? 🤨你話你唔係特登偷我杯珍珠奶茶係咩意思先）
冇錯呢兩個都係由細到大，大家認識既Mean既意思。但喺美國，大家可能每幾日都會聽到Mean呢個字，不過係會用作形容詞。 佢常見既用法例如：He is quite a mean person. 佢個人都幾刻薄/唔nice。如果有個人同你講You are so mean! 就要睇佢咩表情，如果佢係🤬，就好明顯係覺得你唔Nice，要反省下。但如果佢係☺，就等於電視劇成日見到「咦～乜你咁衰㗎～」，下一步要點做，都可以反省下☺
睇到呢度，你可能開始諗「哦，咁Mean即係解唔好既野啦」，呀呢度就係好玩之處，如果有人同你講句You are such a mean cook! You make a mean steak! 個意思唔洗話你煮飯煮得刻薄，係讚緊你煮好，整件牛扒得好好食！當然最尾呢個用法係slang（俚語） 嚟嘅，喺書本上好少見到，但同人對話時唔多唔少都會出現，遇到人地講Mean既時候記得搞清楚喇😉
美國交換生計劃係咩嚟？可以睇下 【 呢度 】
搶先登記 【 升學分享會 】
