fbpx

【KikiAllAboutUS】長途機survival guide part 2🛫

唔知survival guide part 1有無令到大家心郁郁想去美國一轉,即刻試下啲貼士?而家就分享part 2,等你哋放心去美國😊

-飛機上㊙

1)除左part1講嘅一啲物件,我自己仲有上機三寶- 一對襪、吉水樽、潤唇膏。🧦一對襪:無論你著乜嘢鞋上機,都可以帶多對襪。搭長途機,對腳坐得太耐會有啲腫,所以除左對鞋都頗正常。一對新襪除左可以防止除鞋後有異味外,仲確保自己唔會無意中冒犯到其他人🤭因為去美國嘅航機通常都有唔同文化背景嘅乘客,對某啲文化來講,赤腳走來走去係唔尊重嘅行為,所以著返對襪,舒服自己又幫到人哋😉


🍼吉水樽:坐到埋位,通常大家都會扣好安全帶,坐定定。其實可以趁呢個時候到出餐位果度斟定一支水🚰(登登燈凳,就係用你個吉樽),等你隨時有得飲。因為喺起飛後嘅30分鐘,空中服務員通常都會好忙,未必有時間好快回應你住。
💄潤唇膏:無一件事會辛苦過嘴唇喺飛機乾到爆拆,又無潤唇膏搽!痛足10個鐘之餘仲忍唔住係咁舔嘴唇🤐最尾都係頂唔順喺機上購物雜誌用100蚊買支潤唇膏……所以都係帶定先。潤唇膏仲有一個用途,萬一生手指倒刺🤚,都可以用潤唇膏搽一搽。

2)唔好睇少最簡單嘅一環,你坐嘅座位好重要,尤其係1-2人去旅行嘅時候!我如果係自己一個人飛長途,就無論如何都會坐aisle位(走廊位),唔洗叫醒隔離位都去到廁所,仲有方便就做下面第4點講嘅嘢!另外,有朋友可能會想近水樓台,諗住坐喺廁所附近就肯定唔洗等啦! 無錯,係唔洗等,可能成程機夾埋慳左你10分鐘,但班機上嘅其他人要等呢,而佢哋等嘅時候就企曬喺你附近,連續地開關門,所以如果你係會訓覺嘅就可能要避免廁所附近喇!🚽

3)#唔講唔知,一個人身體每日平均會製造0.7-1公升嘅氣體(咩氣體?大家講起都尷尷尬尬果啲啊😳),而飛機起飛後,氣壓下降,你身體裡面嘅氣體相對地體積會膨脹,所以有時你覺得搭飛機個肚唔係好舒服,漲起成個波咁,其實係真有其事!所以喺機上可注意減少飲汽水🥤❌,減少氣體膨脹啊。另外,如果諗住喺機上食得健康啲,多菜少肉嘅話,又係要注意了,因為椰菜類嘅蔬菜被消化嘅時候,係會產生特別多氣體,例如椰菜花、椰菜、水芹、白菜、西蘭花、甘藍等等,要小心啲食喇! 身體裡面無咁多氣體,自然休息得好啲。

4)有唔少旅友/同事都曾經問過我,點解我搭完長途機之後可以咁有精神,仲可以即刻揸車,唔攰架咩?以下呢個貼士,如果跟住schedule,持之以恆地做,絕對係可以幫助你速回體力。而呢樣嘢就係,每30分鐘企起身,去空曠嘅地方拉筋🤸‍♀! 甚至,我有時會由座位行去機尾拉筋放鬆,再行兩個圈先返返座位。保持肌肉靈活柔軟,唔好硬曬軚,落機之後就會快適應當地氣溫、時差。

大家如果仲有長途機貼士請大方留言同分享,我會親自嘗試再寫個review!

Posted on Dec 15, 2019

Article by admin / Blog / No Comments