fbpx

【KikiAllAboutUS】8個美國留學生奇怪生活習慣

去到美國讀書,文化、生活規律唔同咗,當然會出現好多奇怪又好笑嘅生活習慣,今次我徵集咗唔同美國同學喺美國讀書做過嘅事,俾大家笑下。
1) 飲水喉水🚰美國某啲城市嘅水去到你屋企之前已經過濾咗,直接打開水喉就飲得,唔洗再煲。


2) 屋企無水飲💧如果你個城市啲城市啲水無得直接飲,屋企就經常會因為唔記得買而缺水幾日,要等到返學校飲😂 飲用水可以喺超市拿個大樽去拿,或者買濾水器過濾。


3) 叮水🛎學生為咗慳錢唔買水煲,無熱水就用微波爐叮,錢係慳返但係唔知會唔會有輻射🤔 同埋啲叮水真係有啲難飲,用來沖咖啡還可以。

4) 早午晚三餐都食早餐🍳讀大學要衝GPA,而且有時間寧願約朋友/做運動/洗衫,所以早餐簡單cereal,午餐整個三文治,夜晚喺屋企打開雪櫃見到啲材料又唔係好想煮,再見到支牛奶結果決定快快脆脆都係食cereal做晚餐算🤷‍♀

5) 同一套衫著兩日👕承上題,無咩時間洗衫,諗諗下發現聽日上堂schedule同今日無一樣嘅堂,做個環保小先鋒,套衫都係著埋聽日先洗😳


6) 著gym衫著成日⛹‍♂10% 因為自己lunch time會做運動,做完立即去上堂,所以沖完涼換件乾淨T-shirt就去上堂👍90% 因為好多美國同學日日去gym同打校隊,見佢地著得咁型成個LeBron James咁,所以我都著下,應該都似Jeremy Lin 👍👍😬

7) 唔買教科書📚因為新書太貴,要幫屋企慳錢,同個friend夾埋,你星期一上數學,我就星期二先上,咁就可以同一本書輪住用喇。#唔講唔知 香港教科書貴,美國教科書亦都唔弱,美國有本哲學教科書,一本就賣$1,450美金!堪稱全美最貴😨 不過唔洗驚,有好多網站可以買到平嘅二手書,我就最鍾意用chegg同Amazon,差唔多大部分書都只需要半價至3折!😉


8) 出席好多校園活動,因為有free pizza 🍕 唔想煮飯,唔想早午晚三餐都食早餐,唔想出街食太貴,當然就要靠唔同學會嘅free pizza 🤤

Posted on Dec 15, 2019

Article by admin / Blog / No Comments